Gestir og gangandi

Sveitarfélagið Ölfus er landstórt sveitarfélag, um 750
ferkílómetrar og er vestast í Árnessýslu.  Íbúar eru í kringum 2000.  Aðal atvinnugreinar eru fiskveiðar og vinnsla, verslun og þjónusta, landbúnaður og iðnaður.  Margar góðar reiðleiðir eru í dreifbýlinu enda er mikil hrossarækt og hestamennska í Ölfusinu.  Þorlákshöfn er þéttbýlisstaður sveitarfélagsins með um 1600 íbúa.  Nafn sitt dregur Þorlákshöfn af Þorláki helga Skálholtsbiskupi (1133-1193).

Snemma hófst útræði frá Þorlákshöfn.  Á vertíðum var oft róið á 20-30 áraskipum frá Þorlákshöfn og má því áætla að íbúarnir hafi verið um 3-400 yfir vertíðina. Þéttbýlið í Þorlákshöfn myndaðist um og upp úr miðri síðustu öld í kjölfar öflugrar uppbyggingar á vegum Meitilsins hf.  Þá fjölgaði íbúum mikið eftir eldgosið í Heimaey.

Ferðaþjónusta er vaxandi atvinnugrein, sérstaklega í dreifbýli.  Ýmsir gistimöguleikar eru fyrir hendi, veitingastaðir, kaffihús og boðið uppá hestaferðir.  Víða er veiði í vötnum og í ósum Ölfusár.  Rútur ganga frá Reykjavík til Þorlákshafnar.  Við bæjarmörkin í Þorlákshöfn er 18 holu golfvöllur, í Ráðhúsi Ölfuss er kaffihús, bókasafn og upplýsingamiðstöð og í bænum eru fleiri veitingastaðir.  Glæsileg íþróttaaðstaða er í Þorlákshöfn með nýrri sundlaug og við hana tjaldstæði.