Nýr samningur við Markaðsstofu Suðurlands undirritaður
Í dag var undirritaður nýr samningur við Markaðsstofu Suðurlands til næstu þriggja ára. Markaðsstofa Suðurlands hefur unnið mikið markaðs- og kynningarstarf fyrir Suðurlandið, bæði innanlands og utan, með sérstakri áherslu á að auka atvinnustarfsemi og gjaldeyristekjur með auknum fjölda gesta og íbúa á Suðurlandi. Sömuleiðis leitast Markaðsstofan við að efla samstarf og upplýsingamiðlun atvinnulífs, sveitarfélaga og ríkisvalds, bæta ímynd svæðisins og auka eftirspurn eftir vörum og þjónustu sem eru í boði á Suðurlandi. Það er því mikill ávinningur fyrir sveitarfélögin að vera aðilar að Markaðsstofunni.
Með samningi til þriggja ára er hægt að vinna að markvissri kynningu og markaðssetningu á Ölfusinu, þar sem þekking og reynsla Markaðsstofunnar nýtist í samstarfi við þekkingu og reynslu heimafólks.
Meðfylgjandi mynd var tekin þegar Ólafur Örn Ólafsson, bæjarstjóri og Davíð Samúelsson, framkvæmdastjóri Markaðsstofunnar undirrituðu samninginn rétt eftir hádegi í dag.
