Fundargerðir

Bæjarráð Ölfuss - 453

Haldinn í fjarfundi,
06.11.2025 og hófst hann kl. 12:15

Fundinn sátu: Grétar Ingi Erlendsson formaður,
Sigurbjörg Jenný Jónsdóttir aðalmaður,
Hrönn Guðmundsdóttir aðalmaður,
Berglind Friðriksdóttir áheyrnarfulltrúi,
Elliði Vignisson bæjarstjóri,
Sandra Dís Hafþórsdóttir sviðsstjóri,

Fundargerð ritaði: Sandra Dís Hafþórsdóttir, sviðsstjóri

Dagskrá:

Almenn mál

1. 2312024 - Umsókn um lóð - Selvogsbraut 8

Yrkir eignir, fasteignafélag Krónunnar, leggur fram beiðni um framlengdan frest vegna lóðarúthlutunar. Félagið hefur verið að vinna að því að finna hagkvæma lausn til að endurnýja Krónuverslunina í Þorlákshöfn.

Bæjarráð tók til umsagnar erindi Yrki eigna ehf., dags. 15. október 2025, þar sem óskað er eftir viðbótarfresti til nýtingar byggingarréttar á lóðinni Selvogsbraut 8.

Bæjarráð áréttar að í sveitarfélaginu hefur orðið veruleg íbúafjölgun á undanförnum árum, eða tæplega 40% á átta árum. Fyrir liggur að sú þróun mun halda áfram. Til marks um það þá eru núna í byggingu um 270 íbúðir sem munu hýsa um 700 íbúa.

Af þessum ástæðum telur bæjarráð að fyrir liggi brýn þörf á frekari uppbyggingu verslunar- og þjónusturýma í sveitarfélaginu. Þannig sé öflug matvöruverslun ein af grundvallarforsendum fyrir því að tryggja fullnægjandi þjónustu við núverandi og vaxandi íbúafjölda.

Með vísan til framangreinds telur bæjarráð að hvorki séu fyrir hendi forsendur né rök til að veita langan frest til nýtingar lóðar- og byggingarréttarins enda úthlutun komin töluvert fram yfir fresti úthlutunarreglna.

Bæjarráð telur jafnframt ástæðu til að íhuga vandlega að kanna vilja annarra rekstraraðila lágvöruverðverslana til að koma upp þjónustu í Þorlákshöfn, í samræmi við fyrirsjáanlega þjónustuþörf íbúa verði ekki hafist handa við uppbyggingu á lóðinni.

Að öllu framangreindu virtu samþykkir bæjarráð að veita Yrki eignum ehf. tveggja mánaða frest (til 5. janúar 2026) til að leggja fram fullmótaða, bindandi og tímasetta áætlun um framtíðarnýtingu lóðarinnar Selvogsbraut 8. Ljúki aðili ekki framangreindu innan umrædds frests verður málið tekið til frekari afgreiðslu á grundvelli lóðarreglna sveitarfélagsins.

Samþykkt samhljóða.

2. 2510091 - Beiðni um viðbótarfrest til nýtingar á byggingarrétti

Yrkir eignir, lóðarhafi lóðarinnar Selvogsbraut 12 óska eftir viðbótarfresti til nýtingar á byggingarrétti á lóðinni.

Veittur er viðbótarfrestur fram til 5. janúar 2026.

Samþykkt samhljóða.

3. 2510044 - Ósk um stækkun lóðar - Nesbraut 8

Fyrirtækið Dolos ehf., lóðarhafi að Nesbraut 8 leggur fram beiðni um stækkun lóðarinnar svo hægt sé að koma fyrir allt að 10.000 m2 atvinnuhúsnæði. Húsnæðið verður notað sem vöruhús fyrir laxafóður sem er ætlað til notkunar fyrir fiskeldi á Laxabraut.

Málið hefur áður komið fyrir skipulags- og umhverfisnefnd og var þar afgreitt á þennan máta:

Afgreiðsla skipulags- og umhverfisnefndar:
Nefndin tekur jákvætt í erindið og telur að tilgreind lóðastækkun falli að framtíðarskipulagi svæðisins, það er að segja að vöruhús tengt hafnsækinni þjónustu og stoðkerfi fiskeldis fari vel á þessum stað. Í samræmi við fordæmi þegar atvinnulóðir eru stækkaðar inn á óskipulagt svæði vísar nefndin formlegri úthlutun og viðeigandi samningagerð til bæjarráðs. Vísast þar m.a. til þess fordæmis þegar lóðir First Water, Landeldisstöðvarinnar Thor og fl. voru stækkaðar inn á óskipulagt svæði.

Nefndin mælist til þess að úthlutun verði gerð með fyrirvara um heildstætt deiliskipulag á svæðinu og vísast þar til H3 skipulagshóps. Mikilvægt er að hafa í huga að ásýnd svæðisins og útlit húsa skiptir miklu máli og því mikilvægt að kröfur um útlit, hæð húsa, lykt- og ljósmengun séu gerðar í deiliskipulagi vegna nálægðar við íbúabyggð og útivistarsvæði. Þá telur hún æskilegt að lóðarúthlutun skuli vera bundin skilyrðum úthlutunarreglna sveitarfélagsins um framkvæmdahraða, gatnagerðargjöld o.s.frv.

Með vísan til afgreiðslu fagnefndarinnar samþykkir bæjarráð stækkun lóðarinnar Nesbraut 8 með þeim fyrirvörum sem settir voru af skipulags- og umhverfisnefnd. Bæjarráð ítrekar sérstaklega mikilvægi þess að hafa í huga að ásýnd svæðisins og útlit húsa skiptir miklu máli og því mikilvægt að kröfur um útlit, hæð húsa, lykt- og ljósmengun séu gerðar í deiliskipulagi vegna nálægðar við íbúabyggð og útivistarsvæði.

Samþykkt samhljóða.

4. 2511011 - Fornleifarannsóknir við Egilsbraut - Aukafjárveiting

Lögð er fram beiðni um aukafjárveitingu til fornleifarannsókna á minjasvæði við Egilsbraut / H3 svæði. Rannsóknirnar eru nauðsynlegur þáttur í skipulagsbreytingum á svæðinu er varða athafnasvæði umhverfis H3 svæði og útvíkkun S4 svæðisins þar sem fyrirhuguð er bygging hjúkrunarheimilis.

Bæjarráð samþykkir beiðni um viðauka upp á 6.300.000 kr. til að mæta kostnaði við tilgreindar fornleifarannsóknir.

Samþykkt samhljóða.

5. 2511009 - Beiðni um styrk vegna vinabæjarmóts í Ölfusi 2026

Erindi frá Norræna félaginu í Ölfusi þar sem óskað er eftir styrk að fjárhæð 1.200.000 vegna vinabæjarmóts í sveitarfélaginu sumarið 2026. Einnig er óskað eftir niðurfellingu á leigu á Versölum og ókeypis aðgangi í sundlaug Þorlákshafnar á meðan á viðburði stendur.

Bæjarráð samþykkir að styrkja Norræna félagið í Ölfusi um 1,2 milljónir vegna heimsóknar vinarbæjanna Morse-Rygge í Noregi, Vimmerby í Svíþjóð og Tønder-Skærbæk í Danmörku á vinarbæjarmót í Ölfusi 1. til 5. júlí 2026.

Í erindinu er óskað eftir gjaldfrjálsu aðgengi að sundlaug, veislusalnum Versölum o.fl. Bæjarráð getur ekki orðið við því enda hver eining innan reksturs sveitarfélagsins gerð upp sjálfstætt. Bæjarráð felur því starfsmönnum sínum að kanna væntan kostnað við þessa þætti erindisins og hækka umbeðinn styrk til samræmis.

Samþykkt samhljóða.

6. 2510085 - Erindi frá Viðburðarfélaginu Þollóween

Beiðni frá Viðburðarfélaginu Þollóween þar sem óskað er eftir því að Sveitarfélagið Ölfus finni hentugt húsnæði til þess að geyma og varðveita þá fjölmörgu leikmuni sem tilheyra hátíðahöldunum. Einnig er óskað eftir því að sveitarfélagið styrki Viðburðafélagið um leiguverðið finnist tilhlýðilegt húsnæði.

Um leið og bæjarráð þakkar stjórn Viðburðarfélagsins Þollóween fyrir ómetanlegt framlag til öflugs mannlífs og menningar frestar bæjarráð erindinu þar sem óvíst er hvaða körfur eru gerðar til geymsluhúsnæðis til dæmis hvað varðar stærð o.fl.

Bæjarráð felur starfsmönnum sínum að óska eftir upplýsingum frá viðkomandi hvað ofangreint varðar.

Samþykkt samhljóða.

7. 2511010 - Beiðni um skilmálabreytingu á skuldabréfi

Erindi frá Thor landeldi þar sem óskað er eftir því að lokagreiðslu vegna lóðargjalda skv. skuldabréfi verði skipt í tvennt þannig að fyrri helmingur greiðist 01.02.2026 og síðari helmingur greiðist 01.06.2026.

Bæjarráð samþykkir erindið.

Samþykkt samhljóða.

8. 2510064 - Erindi frá knattspyrnufélaginu Ægi

Erindi frá Knattspyrnufélaginu Ægi sem tekið var fyrir á 50.fundi íþrótta- og tómstundanefndar þann 15.10.2025.

Eftirfarandi var bókað í nefndinni:

Nefndin þakkar góða og yfirgripsmikla samantekt um starf félagsins á árinu og óskar meistaraflokki karla til hamingju með sigur í 2. deild og sæti í Lengjudeildinni næsta sumar.
Varðandi óskir félagsins um styrkveitingar utan núverandi samninga, vísar nefndin málinu til bæjarráðs og vinnslu fjárhagsáætlunar 2026.

Bæjarráð tekur undir hamingjuóskir til Ægis varðandi árangur árangur ársins og þá ekki síst með sigur í 2. deild og sæti í Lengjudeildinni næsta sumar.

Bæjarráð hefur fullan skilning á kostnaði við rekstur afreksliða og þeim takmörkunum sem það veldur þegar stórir styrktaraðilar hætta stuðningi. Eftir sem áður þarf sveitarfélagið að gæta jafnræðis og vinna eftir samþykktum forsendum styrkja.

Fyrir liggur það fordæmi að árið 2011 fór Þór Þorlákshöfn upp í úrvalsdeild í körfubolta og hlaut þá 1.500.000 kr. styrk frá sveitarfélaginu. Á verðlagi ársins í ár eru það um 2.700.000.

Með vísan í fordæmi samþykkir bæjarráð að styrkja Ægi um 2.700.000 vegna sambærilegs árangurs.

Samþykkt samhljóða.

9. 2511012 - Samstarf við Markaðsstofu Suðurlands

Erindi frá Markaðsstofu Suðurlands þar sem óskað er eftir samstarfi á ný við Sveitarfélagið Ölfus um ímyndarsköpun, þróun og markaðssetningu áfangastaðarins Suðurlands í heild.

Bæjarráð vísar erindinu til gerðar fjárhagsáætlunar fyrir árið 2026.

Samþykkt samhljóða.

10. 2511013 - Kynning á leiðaáætlun landsbyggðarvagna

Fyrir bæjarráði lá erindi frá Vegagerðinni vegna breytinga á leiðaráætlun á leið 71. sem þjónustar Þorlákshöfn.

Fram kemur að fyrirhugað er að fjölga ferðum um 70% eða úr 3 í 5. Sérstaklega er horft til bættrar tengingar við leið 51 í Hveragerði í báðar áttir og samþættingar aksturs með íþróttafélögum.

Bæjarráð fagnar því að brugðist skuli við ákalli vaxandi samfélags um auknar almenningssamgöngur. Bæjarráð óskar ennfremur eftir því að tilgreindar breytingar verði kynntar fyrir bæjarbúum.

Samþykkt samhljóða.

Fleira ekki gert. Fundi slitið kl. 13:10

Til baka

Prenta

Prenta síðu

X Loka