Alviðra fræðslusetur

Alviðra við Sogið er náttúruparadís og fræðslusetur Landverndar. Alviðra, Öndverðarnes II og Þrastaskógur er útvistarsvæði fyrir almenning. Efnt er til gönguferða og haldinn fjöldi námskeiða um lífríki og náttúru svæðisins ár hvert. Fræðslan er ætluð fólki á öllum aldursskeiðum. Í Alviðru er gistiaðstaða fyrir tuttugu manns og aðstaða til fræðslu. Í grenndargarðinum ræktar fjöldi fólks eigið grænmeti. Auk fræðslu í húsakynnum Alviðru er stórt indjánatjald í skógarrjóðri yfir sumartímann. Þar geta um 70 manns fundað og leikið.

Í Alvirðu er ljómandi gönguland og gott berjaland. Sogið er ríkulegur lífheimur. Stikaður göngustígur er frá bæjarhúsum Alviðru og upp á Ingólfsfjall. Úr hlíðum og af toppi Ingólfsfjalls er gott útsýni yfir Sogið, Hvítá og Ölfusá og til Heklu, Tindfjalla og Eyjafjallajökuls. Fjölbreytilegar gönguleiðir eru í Þrastaskógi og Öndverðarnesi II.

Alviðra er 651 hektarar að stærð. Magnús Jóhannesson, bóndi í Alviðru, gaf árið 1973 Landvernd og Árnessýslu jarðirnar Alviðru í Ölfusi og Öndverðarnes II í Grímsnesi. Árið 1981 var gerð skipulagsskrá fyrir jarðirnar og Alviðra var gerð að sjálfseignarstofnun.

Veiðiréttur í Sogi fyrir landi Alviðru er leigður til veiðifélagsins Stara ehf. Tekjur af Sogsveiðinni eru nýttar til reksturs og uppbyggingar í Alviðru.

Fyrir hönd Lanverndar stýrir fimm manna stjórn starfi Alviðru. Um fræðsluferðir Alviðru, aðstöðu og upplýsingar sjá vefsíðu Landverndar. Senda má fyrirspurnir um aðstöðu, leigu og fræðslu á netfangið alvidra@landvernd.is