Starfsmannahandbók

 Vinnuveitendahlutverk sveitarstjórna

Sveitarfélög á Íslandi eru samanlagt einn stærsti vinnuveitandi landsins og eru jafnframt oft stærstu vinnuveitendur í sínu nærumhverfi. Starfsmönnum sveitarfélagsins Ölfuss fjölgar jafnt og þétt. Sú þróun skýrist meðal annars af breyttri verkaskiptingu ríkis og sveitarfélaga, þar sem verkefni hafa færst í auknum mæli til sveitarstjórnarstigsins, auk þess sem fjölgun íbúa og aukin þjónusta kalla á fleiri starfsmenn.

Umtalsverður hluti skatttekna sveitarfélagsins fer í launakostnað, sem undirstrikar að eitt af meginhlutverkum bæjarstjórnar er að gegna hlutverki vinnuveitanda af ábyrgð og fagmennsku.

Bæjarstjórn ber ábyrgð á mótun starfsmannastefnu sveitarfélagsins og þeim kjaraþáttum sem starfsfólki stendur til boða. Sveitarfélagið Ölfus hefur innleitt fjölskylduvæna starfsmannastefnu sem miðar að því að laða að og halda hæfu, ánægðu og metnaðarfullu starfsfólki. Stefnan tekur til allra þátta sem snúa að samskiptum starfsmanna og stjórnenda og styður við jákvætt, heilsusamlegt og uppbyggilegt vinnuumhverfi.

Mannauður sveitarfélagsins er einn mikilvægasti styrkleiki þess. Hann felst í þekkingu, menntun, reynslu, færni og viðhorfum starfsmanna. Bæjarstjórn ber sem vinnuveitandi að viðhalda og efla þennan mannauð með markvissum aðgerðum, svo sem með því að skapa aðstæður fyrir starfsánægju, starfsþróun, símenntun og önnur úrræði sem nánar eru skilgreind í starfsmannastefnunni.