Fundargerðir

Bæjarstjórn Ölfuss - 350

Haldinn í Ráðhúsi Ölfuss,
30.10.2025 og hófst hann kl. 16:30

Fundinn sátu: Gestur Þór Kristjánsson forseti bæjarstjórnar,
Sigurbjörg Jenný Jónsdóttir 1. varaforseti,
Grétar Ingi Erlendsson bæjarfulltrúi,
Erla Sif Markúsdóttir bæjarfulltrúi,
Hrönn Guðmundsdóttir bæjarfulltrúi,
Vilhjálmur Baldur Guðmundsson bæjarfulltrúi,
Berglind Friðriksdóttir bæjarfulltrúi,
Elliði Vignisson bæjarstjóri,
Sandra Dís Hafþórsdóttir sviðsstjóri,

Fundargerð ritaði: Elliði Vignisson, bæjarstjóri

Í upphafi fundar leitaði forseti eftir athugasemdum við fundarboðið. Berglind Friðriksdóttir H-lista tók til máls og lagði fram eftirfarandi bókun:

Undirrituð gerir athugasemd við að gögn fylgdu ekki fundarboði. Skýrt er kveðið á um nauðsyn þess í sveitarstjórnarlögum að gögn fylgi fundarboðun svo unnt sé að taka upplýsta afstöðu til þeirra mála sem í fundarboðun eru tilgreind.

Elliði Vignisson, Hrönn Guðmundsdóttir og Grétar Ingi Erlendsson tóku til máls.

Óskað var eftir fundarhléi. Að því loknu tók forseti til máls og lagði til að mál nr. 2505012 yrði tekið af dagskrá.

Einnig óskaði forseti eftir að mál nr. 2510095 yrði tekið inn með afbrigðum og var það samþykkt samhljóða.

Dagskrá:

Almenn mál

1. 2510073 - Breyting á skipuriti Sveitarfélagsins Ölfuss

Fyrir bæjarstjórn lá minnisblað ásamt tillögu um breytingu á skipuriti sveitarfélagsins. Lagt er til að skipurit sveitarfélagsins skiptist í fimm svið:
Fjármála- og stjórnsýslusvið, fjölskyldu- og fræðslusvið, velferðarsvið, lögfræði- og skipulagssvið og framkvæmda- og hafnarsvið.

Breytingin á skipuritinu er unnin í beinu framhaldi af þeim kerfisbreytingum sem fylgdu því að hætt var sameiginlegum rekstri velferðarmála með öðrum sveitarfélögum í Árnessýslu. Með stofnun lögfræði- og skipulagssviðs er jafnframt tryggt að málefni dreifbýlis fái skýrari farveg, en undir sviðið falla m.a. þjóðlendur, námur, búfjármál, fjallskil o.fl.

Ýmsar aðrar breytingar eru gerðar til bæta stjórnsýslu og færa skipuritið nær því fyrirkomulagi sem unnið er eftir, nefndarskipan o.fl.

Samhliða er lagt til að stofna sérstakt notendaráð fötlunarþjónustu sem hafi hliðstæðan tilgang í fötlunarmálum og öldungaráð hefur í öldrunarmálum.

Elliði Vignisson, Hrönn Guðmundsdóttir og Vilhjálmur Baldur Guðmundsson tóku til máls.

Bæjarstjórn samþykkir framlagða tillögu og samhliða ráðningu á sviðsstjórum og breytt starfsheiti þeirra þar sem það á við.

Samþykkt samhljóða.

2. 2507001 - Fjárhagsáætlun Sveitarfélagsins Ölfuss 2026-2029

Forsendur fjárhagsáætlunar ársins 2026 til staðfestingar.
Bæjarráð fjallaði um forsendurnar á 452.fundi sínum þann 16.10.2025.

Samþykkt samhljóða.

3. 2509068 - Umsókn um framkvæmdaleyfi - uppsetning jarðskjálftastöðva

Lagt er fram erindi frá ÍSOR og Carbfix hf. þar sem sótt er um framkvæmdaleyfi fyrir uppsetningu þriggja jarðskjálftamælistöðva á Hafnarsandi og Nessandi.
Markmið framkvæmdarinnar er að vakta jarðskjálftavirkni í tengslum við fyrirhugaða starfsemi Coda stöðvarinnar í Ölfusi. Stöðvarnar verða reknar af ÍSOR og staðsettar innan 3 km radíuss frá borholu CTE-03. Gert er ráð fyrir að framkvæmdir hefjist um leið og leyfi liggur fyrir og að þeim ljúki fyrir 1. júní 2026. Framkvæmdir felast í uppsetningu fónstæðis og mastra með tilheyrandi jarðskjálftamæli og fjarskiptabúnaði sem gengur fyrir vind- og sólarorku. Fyrir liggur samþykki landeiganda Nessands fyrir framkvæmd á hans landi.

Afgreiðsla skipulags- og umhverfisnefndar: Nefndin leggur til við bæjarstjórn að framkvæmdaleyfi verði veitt fyrir uppsetningu jarðskjálftamælistöðva á Hafnarsandi og Nessandi í samræmi við fyrirliggjandi umsókn og að leyfið verði gefið út skv. reglugerð nr. 772/2012. Skipulagsfulltrúa verði falið að gefa út leyfið.

Grétar Ingi Erlendsson tók til máls.

Bæjarstjórn samþykkir að fresta afgreiðslu málsins og óska eftir ítarlegum upplýsingum um stöðu undirbúnings sem í dag er unnin á forsendum óbindandi viljayfirlýsingar.

Samþykkt samhljóða.

4. 2504133 - Hvoll í Ölfusi - nýtt deiliskipulag

Skipulagið var auglýst og bárust nokkrar athugasemdir. Skipulagshöfundur hefur nú brugðist við athugasemdum og leggur fram uppfært skipulag.

Afgreiðsla skipulags- og umhverfisnefndar: Nefndin beinir því til bæjarstjórnar að skipulagsfulltrúa verði falið að ganga frá málinu í samræmi við 1. málsgrein 42. grein skipulagslaga nr. 123/2010.