Fundargerðir

Skipulags- og umhverfisnefnd - 103

Haldinn í Ráðhúsi Ölfuss,
24.11.2025 og hófst hann kl. 14:00

Fundinn sátu: Geir Höskuldsson formaður,
Hjörtur S. Ragnarsson varaformaður,
Guðlaug Einarsdóttir aðalmaður,
Vilhjálmur Baldur Guðmundsson aðalmaður,
Hrönn Guðmundsdóttir aðalmaður,
Guðmundur Oddgeirsson áheyrnarfulltrúi,
Sigurður Steinar Ásgeirsson skipulagsfulltrúi,
Kristina Celesova starfsmaður skipulags,-bygg.- og umhverfissviðs,

Fundargerð ritaði: Sigurður Steinar Ásgeirsson, Sviðsstjóri Skipulags- og lögfræðisviðs

Dagskrá:

Almenn mál

1. 2509043 - Stækkun grunnskóla Þorlákshafnar - DSK

Umsagnarferli deiliskipulags fyrir stækkun grunnskóla Þorlákshafnar er lokið og engar athugasemdir gerðar af umsagnaraðilum. Ábending barst frá náttúruverndarstofnun um að svæðið væri á náttúruminjaskrá en líklegt verður að teljast að einhvers misskilnings gæti þar, enda lóðin inni í miðjum bæ langt frá náttúruminjasvæðinu Hafnarnesi. Skipulagið er því lagt fram að nýju í óbreyttri mynd.

Afgreiðsla skipulags- og umhverfisnefndar: Nefndin beinir því til bæjarstjórnar að skipulagsfulltrúa verði falið að ganga frá málinu í samræmi við 1. málsgrein 42. grein skipulagslaga nr. 123/2010.

2. 2511046 - Vesturbyggð 3.-4. áfangi - Óv. DSKbr vegna byggingarskilmála

Lögð er fram óveruleg breyting á deiliskipulaginu Vesturbyggð 3-4 áfangi. Breytingunni er ætlað að skerpa á skilmálum varðandi 2ja hæða raðhús syðst í skipulaginu. Mænisstefna er skilgreind og mænishæð aukin úr 7,5m í 9,5m.

Afgreiðsla skipulags- og umhverfisnefndar: Nefndin beinir því til bæjarstjórnar að skipulags og byggingarfulltrúum verði heimilað að samþykkja breytinguna og ganga frá málinu í samræmi við 3. mgr. 43. gr. skipulagslaga nr. 123/2010.

3. 2502047 - Réttarhola deiliskipulag

Umsagnartíma skipulagsins er lokið og bárust 5 umsagnir á umsagnartíma. Aðeins Heilbrigðiseftirlit gerðu athugasemd en hún var á þá leið að sýna þyrfti vatnsverndarsvæði á uppdrætti. Skipulagshöfundur hefur brugðist við athugasemdum og leggur fram uppfært skipulag en bendir á að ekki þurfi að tilgreina vatnsverndarsvæði þar sem ekki er um neysluvatn að ræða.

Afgreiðsla skipulags- og umhverfisnefndar: Geir Höskuldsson vék af fundi við afgreiðslu málsins. Samþykkt með fyrirvara um samþykki landeiganda.

Nefndin beinir því til bæjarstjórnar að skipulagsfulltrúa verði falið að ganga frá málinu í samræmi við 1. málsgrein 42. grein skipulagslaga nr. 123/2010.

4. 2410041 - M2 Óseyrarbraut - breyting á aðalskipulagi

-Endurkoma eftir umsagnarferli
Breytingin hefur verið auglýst skv. 1. mgr. 31. gr. skipulagslaga nr. 123/2010 og barst fjöldi umsagna og athugasemda á kynningartíma tillögunnar.

Lögð eru fram svör skipulagshöfundar við öllum innkomnum athugasemdum, þar sem m.a. er tekið á ábendingum um samlegð íbúðabyggðar og hafnarstarfsemi, græn svæði, þéttleika byggðar, uppbyggingu innviða, ásýnd og sjálfbærni. Í svörum er rakið hvernig tekið verði tillit til þessara þátta við frekari útfærslu í deiliskipulagi og framkvæmdum. Lögð er áhersla á að svæðið sé miðlægt, tengist vel gatnakerfi og falli að markmiðum Aðalskipulags Ölfuss 2020-2036 og Landskipulagsstefnu 2024?2038.

Afgreiðsla skipulags- og umhverfisnefndar: Nefndin beinir því til bæjarstjórnar að skipulagsfulltrúa verði falið að ganga frá málinu í samræmi við 3. mgr. 30. gr. og 2. málsgrein 32. greinar skipulagslaga nr. 123/2010.

5. 2511049 - Náma í lambafelli - Nýtt deiliskipulag

Eden Mining leggja fram beiðni um heimild til að hefja vinnu við gerð deiliskipulags fyrir námu Eden Mining í Lambafelli. Deiliskipulag hafði áður verið unnið fyrir námuna og samþykkt í bæjarstjórn Ölfus en ekki náðist að birta skipulagið í B-deild tímanlega svo það tæki gildi.

Afgreiðsla skipulags- og umhverfisnefndar: Heimild til að gera deiliskipulag veitt.

6. 2511072 - Lóðaúthlutunarreglur sveitarfélagsins Ölfus 2025-2026

Til stendur að uppfæra lóðaúthlutunarreglur sveitarfélagsins fyrir næstu lóðaúthlutun sem mun fara fram í Desember 2025. Breytingarnar fela í sér að lagðar eru á ríkari kröfu um framvindu, gerð krafa um fullnaðarfrágang á innkeyrslum, sett inn skýr ákvæði um í hvaða tilvikum megi úthluta lóð án auglýsingar auk annars.

Afgreiðsla skipulags- og umhverfisnefndar: Nýjar úthlutunarreglur eru staðfestar og vísað til bæjarstjórnar til fullnaðarafgreiðslu.

Nefndin vill einnig benda á að styrkja mætti úthlutunarferlið með því að fulltrúi sýslumanns væri viðstaddur útdrátt lóða, eins og viðgengist hefur til dæmis í nágrannasveitarfélögum.

7. 2511073 - Skipun nefndarmanna í nefnd um opin svæði

Ákveðið hefur verið að stofna stýrihóp um opin svæði í Þorlákshöfn. Skipulags- og umhverfisnefnd mun tilnefna tvo aðila í hópinn.

Afgreiðsla skipulags- og umhverfisnefndar: Nefndin skipar Guðlaugu og Hrönn í stýrihópinn.

8. 2511027 - Bolaölduvirkjun ASKbr

Lögð er fram tillaga að breytingu á aðalskipulagi Ölfus. Breytingin felur í sér að útbúið verði nýtt iðnaðarsvæði I25 þar sem ráðgert er að setja upp jarðvarmavirkjun.

Afgreiðsla skipulags- og umhverfisnefndar: Nefndin beinir því til bæjarstjórnar að skipulagsfulltrúa verði falið að auglýsa breytinguna og ganga frá málinu í samræmi við 31. gr. skipulagslaga nr. 123/2010.

9. 2511034 - Merkjalýsing - Samsett aðgerð - Porkelsgerði 1, Selvogur

Lögð er fram merkjalýsing - samsett aðgerð - Þorkelsgerði 1, Selvogur. Merkjalýsing þessi er unnin skv. gildandi aðalskipulagi Sveitarfélagsins Ölfuss 2020-2036. Jörðin Þorkelsgerði 1 (L171820) er ekki afmörkuð í landeignaskrá HMS og ekki með skráða stærð í fasteignaskrá HMS. Afmörkun og hnit eru skv. landskiptum sem gerð voru fyrir jarðir við Selvog af Verkfræðistofu Suðurlands á árum 1999-2002. Jörðin er í fjórum skikum. Þrír séreignar skikar og einn sameignar skiki í óskiptu landi. Séreignar skikarnir eru 5,2 ha, 8,0 ha og 24,1 ha. Heildarstærð óskipts lands er 522,3 ha. Samtals er heildarstærð jarðarinnar 559,6 ha. Eignarhluti Þorkelsgerði 1 (L171820) í óskiptu landi eru 50%. Eignarhluti Þorkelsgerði 2 (L171821) er 25% og Torfabjar (L171813) er 25%. Á jörðinni eru þrír matshlutar: 01 - ræktað land, 02 - íbúðarhús og 03 - vinnustofa.

Afgreiðsla skipulags- og umhverfisnefndar: Merkjalýsing er samþykkt með fyrirvara um samþykki allra aðliggjandi lóða.

10. 2511035 - Merkjalýsing - Uppskipting landeigna - Hafnarskeið DRE

Lagt er fram merkjalýsing - uppskipting landeigna - Hafnarskeið DRE. Merkjalýsing þessi er unnið skv. gildandi aðalskipulagi Sveitarfélagsins Ölfuss 2020-2036. Stofna á lóðina Hafnarskeið DRE úr Hafnarskeiði 2 (L193594). Hafnarskeið DRE er 25,0 m2. Hafnarskeið 2 (L193594) er með skráða stærð 2634,9 m2 í fasteignaskrá HMS en minnkar nú um það sem því nemur og verður 2609,9 m2. Enginn matshluti er á lóðinni. Engin kvöð er á lóðinni.

Afgreiðsla skipulags- og umhverfisnefndar: Samþykkt

11. 2511023 - Gistirými á efri hæð í iðnaðarhúsnæði - Vesturbakki 2

Til stendur að reisa iðnaðarbil að Vesturbakka 2 og er byggingarleyfisumsókn í vinnslu. Lóðin er innan athafnasvæðis AT1 í aðalskipulagi. Í umsókninni er gert ráð fyrir að á neðri hæð hússins séu iðnaðarbil en gert sé ráð fyrir íbúðum á efri hæð til skammtímaútleigu. Lóðarhafi óskar eftir staðfestingu á að sú tilhögun sé í samræmi við skipulag á svæðinu.
Lóðarhafi vill benda á að notkun húsnæðis verður tilgreind í eignaskiptasamningi og þá kæmi þar fram að um væri að ræða íbúðir til skammtíma búsetu og lögheimilsbúseta verði með öllu óheimil.

Afgreiðsla skipulags- og umhverfisnefndar: Nefndin bendir á fyrri bókun sambærilegs erindis í Vesturbakka 1. Þar kom fram í bókun nefndarinnar: "Skipulag heimilar ekki að útbúnar verði íbúðir í húsinu en nefndin setur sig ekki á móti því að þar verði samþykkt gistirými."
Á aðaluppdráttum og í skráningatöflu í byggingarleyfisumsókn fyrir Vesturbakka 2 er tilgreint að um íbúðir sé að ræða semsamræmist ekki skipulagi.

Fleira ekki gert. Fundi slitið kl. 16:00

Til baka

Prenta

Prenta síðu

X Loka