Fundargerðir

Öldungaráð - 14

Haldinn Verið - fundarsalur Ölfus Cluster,
29.10.2026 og hófst hann kl. 08:30

Fundinn sátu: Bettý Grímsdóttir formaður,
Ásta Júlía jónsdóttir varaformaður,
Guðmundur Oddgeirsson aðalmaður,
Halldór Sigurðsson aðalmaður,
Hafdís Þóra Ragnarsdóttir aðalmaður,
Jóhanna M Hjartardóttir sviðsstjóri,
Kolbrún Una Jóhannsdóttir forstöðumaður,

Fundargerð ritaði: Jóhanna M. Hjartardóttir, sviðsstjóri

Formaður setti fund og bauð nýtt öldungaráð velkomið til starfa.

Sigrún Ína fulltrúi HSu boðaði forföll.

Dagskrá:

Mál til kynningar

1. 2304041 - Samþykktir öldungaráðs

Samþykktir fyrir nýskipað öldungaráð þessa kjörtímabils lagðar fram til kynningar.

Formaður fór yfir samþykktir fyrir öldungaráð Ölfuss sem skipað var vorið 2026.

Samkvæmt 3. gr. samþykkta um hlutverk og skipan öldungaráðs kýs ráðið sér varaformann. Formaður lagði til að Ásta Júlía yrði kjörin varaformaður öldungaráðs. Tillagan var samþykkt samhljóða.

2. 2602024 - Málefni aldraðra - upplýsingabæklingur um þjónustu

Sviðsstjóri kynnti upplýsingabækling um þjónustu fyrir íbúa 67 ára og eldri í Ölfusi, þar sem tekin er saman helsta þjónusta og úrræði sem standa eldra fólki til boða. Jafnframt var farið yfir upplýsingar um þjónustuna á heimasíðu sveitarfélagsins.

Öldungaráð þakkar fyrir framlagða kynningu á upplýsingabæklingi um þjónustu fyrir íbúa 67 ára og eldri í Ölfusi, sem og yfirferð á upplýsingum á heimasíðu sveitarfélagsins. Ráðið telur mikilvægt að eldri íbúar hafi greiðan aðgang að skýrum og aðgengilegum upplýsingum um þá þjónustu og úrræði sem þeim standa til boða.

Öldungaráð leggur til að upplýsingarnar verði reglulega endurskoðaðar og uppfærðar í samræmi við breytingar á þjónustu og þörfum markhópsins.

3. 2312011 - Stefna um málefni eldri borgara

Stefna um málefni eldri borgara lögð fram til kynningar.

Í stefnumótun í málefnum eldri borgara hefur verið lögð áhersla á að skapa heildstæða sýn þar sem öll þjónusta sveitarfélagsins við eldri borgara er skoðuð sem ein samfelld heild. Í stefnunni er dregið fram hvaða málaflokkar hafa áhrif á líf og lífsgæði eldri borgara og settar fram áherslur sveitarfélagsins. Mikilvægt er að stefnan sé lifandi, taki mið af samfélagslegri þróun, nýjustu þekkingu og breytilegum þörfum íbúa.

Í stefnumótuninni var haft víðtækt samráð. Rætt var við eldri borgara í félagslegu leiguhúsnæði aldraðra, Félag eldri borgara og verkefnisstjóra í heilsueflingu 60 ára og eldri. Fundað var með fulltrúum heilsugæslunnar í Þorlákshöfn og starfsfólki í öldrunarþjónustu. Íbúafundur um málefni eldri borgara var haldinn haustið 2023 og málþing um um málefni eldra fólks var haldið í október 2024. Báðir fundir voru vel sóttir og höfðu niðurstöður fundanna áhrif á mótun stefnunnar.

Öldungaráð fagnar stefnunni og telur hana mikilvægan grunn að áframhaldandi þróun á þjónustu og stuðningi við eldra fólk í sveitarfélaginu.

4. 2312021 - Starfsáætlun sviðsstjóra - kynning

Sviðsstjóri fjölskyldu- og fræðslusviðs kynnti helstu áherslur og verkefni sviðsins samkvæmt starfsáætlun fyrir starfsárið. Kynningin tók meðal annars til þjónustu við íbúa, fræðsluverkefna og þeirra viðfangsefna sem lögð verður sérstök áhersla á á komandi misserum.

Jafnframt var farið yfir upplýsingar á heimasíðu Ölfuss sem varða þjónustu og upplýsingagjöf til íbúa.

Öldungaráð þakkar fyrir kynninguna og fagnar þeim áherslum sem unnið er eftir til að efla þjónustu og upplýsingagjöf til íbúa sveitarfélagsins.

Öldungaráð samþykkti að standa fyrir fræðsluerindum á nýju ári með það að markmiði að efla þekkingu, heilsulæsi og vellíðan eldri íbúa sveitarfélagsins. Fyrsta erindið verður í samstarfi við Krabbameinsfélagið Framför og mun fjalla um karlaheilsu, með áherslu á forvarnir, heilsueflingu og mikilvægi þess að leita sér upplýsinga og aðstoðar vegna heilsufarsmála.

Fleira ekki gert. Fundi slitið kl. 10:00

Til baka

Prenta

Prenta síðu

X Loka