Fundargerðir

Bæjarstjórn Ölfuss - 360

Haldinn í Ráðhúsi Ölfuss,
26.08.2026 og hófst hann kl. 16:30

Fundinn sátu: Gestur Þór Kristjánsson forseti bæjarstjórnar,
Sigurbjörg Jenný Jónsdóttir 1. varaforseti,
Grétar Ingi Erlendsson bæjarfulltrúi,
Erla Sif Markúsdóttir bæjarfulltrúi,
Guðlaug Einarsdóttir bæjarfulltrúi,
Gunnsteinn R. Ómarsson bæjarfulltrúi,
Berglind Friðriksdóttir bæjarfulltrúi,
Elliði Vignisson bæjarstjóri,

Fundargerð ritaði: Elliði Vignisson, bæjarstjóri

Dagskrá:

Almenn mál

1. 2608053 - Skapandi sumarstörf fyrir ungmenni

Tillaga frá bæjarfulltrúum S-lista um skapandi sumarstörf fyrir ungmenni í sveitarfélaginu.

Svohljóðandi afgreiðslutillaga borin fram af Guðlaugu Einarsdóttur fyrir hönd fulltrúa D lista:

Fulltrúar D-listans taka jákvætt í markmið tillögunnar enda fellur hún fellur vel að stefnuskrá beggja flokka eins og þeir kynntu þær í aðdraganda kosninga í vor. Í stefnuskrá D-listans, Áfram af ábyrgð, var meðal annars lögð áhersla á að „efla frístundastarf og tækifæri ungmenna“, „auka aðkomu ungmenna að menningarviðburðum“ og „auka aðstöðu fyrir listir og skapandi greinar“. Þá var sérstaklega lögð áhersla á að virkja ungt fólk til áhrifa í gegnum ungmennaráð.
Skapandi sumarstörf geta sannarlega verið góð leið til að hrinda þessum markmiðum í framkvæmd, gefa ungmennum færi á að njóta hæfileika sinna og skapa um leið samfélaginu verðmæti. Mikilvægt er þó, í samræmi við áherslu D-listans á ábyrga fjármálastjórn og vönduð vinnubrögð, að fyrirkomulag, markhópur, umfang, kostnaður og árangursviðmið liggi fyrir áður en endanleg ákvörðun um fjármögnun verður tekin.
Fulltrúar D-listans leggja því til að verkefnið verði útfært sem afmarkað tilraunaverkefni fyrir sumarið 2027, í samráði við ungmennaráð, og að kostnaðar- og verkefnaáætlun verði lögð fram við vinnslu fjárhagsáætlunar fyrir árið 2027.

Tillagan samþykkt samhljóða.

2. 2608052 - Stuðningur við starfsfólk leikskóla til náms í leikskólakennarafræðum

Tillaga frá bæjarfulltrúum S-lista um stuðning við starfsfólk leikskóla til náms í leikskólakennarafræðum.

Svohljóðandi afgreiðslutillaga barst frá undirrituðum fulltrúum D-lista:

Fulltrúar D-listans taka undir markmið tillögunnar um að fjölga fagmenntuðum leikskólakennurum og styrkja faglegt starf leikskóla sveitarfélagsins.
Markmið tillögunnar fellur vel að stefnuskrá D-listans, Áfram af ábyrgð. Þar er lögð áhersla á að hagsmunir barna séu í forgrunni ákvarðana, að tryggja áframhaldandi gæði í þjónustu við fjölskyldur, fjölga leikskólaplássum og tryggja börnum framúrskarandi uppvaxtarskilyrði. Hæft og vel menntað starfsfólk er ein mikilvægasta forsenda þess að þessi markmið náist.
Fulltrúar D-listans telja þó mikilvægt að stuðningur við nám starfsmanna byggist á skýrum og almennum reglum, jafnræði, tengslum námsins við viðkomandi starf og ábyrgri meðferð fjármuna. Sveitarfélagið hefur þegar sett sér reglur um launuð námsleyfi starfsmanna og því er eðlilegra að endurskoða og þróa þær reglur en að koma á sérstöku og óútfærðu stuðningskerfi fyrir einn starfsmannahóp.
Með það að leiðarljósi felur bæjarstjórn bæjarstjóra að láta endurskoða sérstaklega árangur þess fyrirkomulags sem áður hefur verið viðhaft gagnvart starfsfólki. Við vinnuna verði sérstaklega metnir kostir þess að bæta inn í reglurnar heimild fyrir starfsmenn, sem uppfylla skilyrði þeirra meðal annars um starfsaldur, til að fá allt að fimm daga á önn án launaskerðingar vegna staðlota og prófa, enda tengist námið starfi viðkomandi hjá sveitarfélaginu. Niðurstaða slíkrar vinnu verði forsenda ákvörðunar í tengslum við fjárhagsáætlun 2027.
Með því móti er hægt að styðja með markvissum hætti við menntun og starfsþróun, fjölga fagmenntuðu starfsfólki allra stofnanna og bæta samhliða þjónustu við börn og fjölskyldur, um leið og gætt er að jafnræði milli starfsmanna, gagnsæis og ábyrgrar fjármálastjórnar.

Erla Sif Markúsdóttir, Grétar Ingi Erlendsson, Guðlaug Einarsdóttir og Sigurbjörg Jenný Jónsdóttir.

Tillagan borin upp. Sex bæjarfulltrúar greiddu afgreiðslutillögunni atkvæði sitt. Gestur Þór Kristjánsson D-lista sat hjá og lagði fram eftirfarandi bókun:

Undirritaður tekur undir mikilvægi þess að fjölga fagmenntuðum leikskólakennurum og efla faglegt starf leikskóla sveitarfélagsins. Hann telur hins vegar ekki rétt að sveitarfélagið stofni með sérstökum ákvörðunum til viðbótarréttinda eða launagreiðslna til einstakra starfsmannahópa umfram það sem leiðir af gildandi kjarasamningum og almennum reglum sveitarfélagsins.
Starfskjör opinberra starfsmanna eiga að byggjast á kjarasamningum, jafnræði og gagnsæjum reglum en ekki sértækum pólitískum ákvörðunum.
Sveitarfélagið fer með skattfé íbúa en ekki eigið fé og ber því skylda til að sýna sérstaka varfærni við ráðstöfun þess. Þá felur tillagan í sér fyrirheit um fjármögnun áður en umfang, fyrirkomulag og kostnaður liggja fyrir. Með vísan til framangreinds situr undirritaður hjá við afgreiðslu tillögunnar

Gestur Þór Kristjánsson
D-lista

3. 2405090 - Hraunstjörn og Hraunsland nýtt DSK

Endurauglýsing

Skipulagið er endurauglýst þar sem 12 mánaða frestur var liðinn áður en það var birt í B-deild. Lagt er fram nýtt deiliskipulag fyrir lóðirnar Hraunstjörn og Hraunsland. Á svæðinu er hraun sem rann eftir ísöld og er því friðað samkvæmt náttúruverndarlögum. Byggingarreitum hefur verið fundinn staður þar sem hraunið er gróið og hefur takmarkað verndargildi.

Afgreiðsla skipulags- og umhverfisnefndar: Nefndin beinir því til bæjarstjórnar að skipulagsfulltrúa verði falið að auglýsa tillöguna í samræmi við 1. málsgrein 41. greinar skipulagslaga nr. 123/2010.