Fundargerðir

Bæjarstjórn Ölfuss - 295

Haldinn í Ráðhúsi Ölfuss,
21.10.2021 og hófst hann kl. 16:30

Fundinn sátu: Gestur Þór Kristjánsson forseti bæjarstjórnar,
Steinar Lúðvíksson 1. varaforseti,
Grétar Ingi Erlendsson bæjarfulltrúi,
Eiríkur Vignir Pálsson 2. varamaður,
Jón Páll Kristófersson bæjarfulltrúi,
Þrúður Sigurðardóttir bæjarfulltrúi,
Ágústa Ragnarsdóttir 2. varamaður,
Elliði Vignisson bæjarstjóri, Sandra Dís Hafþórsdóttir sviðsstjóri.

Fundargerð ritaði: Sandra Dís Hafþórsdóttir, sviðsstjóri

Dagskrá:

Almenn mál

1. 2011004 - Viljayfirlýsing-samstarf um útflutning á jarðefnum
Á fundinn kom Þorsteinn Víglundsson til að gera grein fyrir stöðu mála hvað varðar undirbúning að verksmiðju til framleiðslu á íblöndunarefni í sement. Í máli hans kom m.a. fram að samstarf við sveitarfélagið og landeigendur á námusvæði hefur gengið vel. Fyrirtækið er komið með undirbúning verksmiðju á þann stað að þeir munu á næstu dögum sækja formlega um þær lóðir við Þorlákshöfn sem þeir þurfa undir framleiðsluna. Rannsóknir og þróunarvinna á vegum Heildelberg hefur gengið afar val og bráðabirgðaniðurstöður lofa góðu. Fram kom að stefnan sé að þegar upp verður staðið nemi útflutningur á unninni vöru milljón tonna. Rætt var sérstaklega um umhverfi væntanlegrar verksmiðju. Í máli Þorsteins kom fram að ekki verði um neinar opnar efnisþrær að ræða heldur verði allt ferlið í lokuðum kerfum og því ekki um að ræða hljóð né heldur rykmengun. Fyrir liggur enn fremur skilningur á eðlilegum kvöðum um frágang lóðar, gerð mannvirkja og flutningur efnis. Þær kvaðir ná ekki hvað síst til útlits og umhverfis. Tímarammi framkvæmda er þannig að fyrsta fasa er lokið en í honum var fólgin fýsileikakönnun hvað varðar útflutning á unnu efni. Sú vinna skilaði einnig niðurstöðum sem sýna mikilvægi þess að hefja frekari vinnslu þessra efna sem fyrst. Framleiðsla á fullunnu efni gæti hafist árið 2024. Framkvæmdir á lóðinni gætu þurft að hefjast árið 2023. Frummat gerir ráð fyrir að heildar fjárfesting á bak við framkvæmdina nemi um 10 milljörðum.
Bæjarstjórn þakkar kynninguna.


Gestir
Þorsteinn Víglundsson - 16:30

2. 1605028 - Samstarf sveitarfélaga Fundargerðir Héraðsnefndar Árnesinga.

Húsnæðismál Héraðsskjalasafns Árnesinga, áður á dagskrá 294.fundar þann 06.10.2021.

Í framhaldi af frestun afgreiðslu frá seinasta bæjarstjórnarfundi tók bæjarstjórn á ný til umfjöllunar húsnæðismál Héraðsskjalasafns Árnesinga og verkferla Héraðsnefndar þar að lútandi.

Eftir framlagningu minnisblaðs frá lögmanni og við nánari skoðun telur bæjarstjórn Ölfuss ekki mögulegt að samþykkja þá leið sem mörkuð hefur verið af Héraðsnefnd Árnesinga. Vísast þar fyrst og fremst til þess að málið einkennist af skorti á aðhaldi og virðingu fyrir fjármunum skattborgara á starfssvæðinu. Ákvörðun um að byggja skjalageymslu á því svæði þar sem fermetraverð er hið hæsta á starfssvæðinu vekur furðu og kostnaður því að mati bæjarstjórnar Ölfuss of hár til að hægt sé að samþykkja málið.

Þá vísast enn fremur til þess að hluti málatilbúnings er með þeim hætti að vafi leikur á því að allir áhugasamir aðilar hafi haft sömu aðstöðu til þátttöku í tilboðsgerð. Svo fór enda að einungis eitt tilboð barst og var þar um að ræða þann eina aðila sem Héraðsnefndin hafði áður rætt við og útfært hugmyndir með. Tilboðið hljóðaði upp á kaupverð nálægt 570.000 pr. m2 eða tæpar 400.000.000 fyrir 700 m2 óinnréttað húsnæði til skjalageymslu.

Bæjarstjórn hafnar því þátttöku í framkvæmdum við nýtt húsnæði Héraðsskjalasafns á þeim forsendum og þeim kostnaðartölum sem nú er unnið útfrá. Bæjarstjórn beinir því til Héraðsnefndar að leita leiða til að ná niður kostnaði við tilgreinda framkvæmd og tryggja að allir áhugasamir sitji við sama borð.

Samþykkt samhljóða.

3. 1706029 - Húsnæðismál Húsnæðisáætlun Sveitarfélagsins Ölfuss

Ráðgjafafyrirtækið Ráðrík ehf. leggur fram til samþykktar nýja húsnæðisáætlun fyrir sveitarfélagið sem það hefur unnið.
Í áætluninni er spáð 5% íbúafjölgun á næstu árum og eru leiddar líkur að því að á árunum 2022-2025 þurfi 190 nýjar íbúðir og árin 2026-2029 þurfi 218 nýjar íbúðir í sveitarfélaginu.

Áætlunin samþykkt og skipulagsfulltrúa falið að senda hana til Húsnæðis- og mannvirkjastofnunnar - HMS.

Samþykkt samhljóða.

4. 2110033 - DSK Akurgerði ferðaþjónustuhús

Efla leggur fram deiliskipulagstillögu fyrir Akurgerði við Hvammsveg sem gerir m.a. ráð fyrir 4 nýjum smáhýsum fyrir gistingu og íbúðarhúsi.

Niðurstaða nefndar: Nefndin beinir því til bæjarstjórnar að skipulagsfulltrúa verði falið að auglýsa tillöguna í samræmi við 1. málsgrein 41. gr. skipulagslaga nr. 123/2010 m.s.br.