Fundargerðir

Til bakaPrenta
Bæjarráð Ölfuss - 468

Haldinn í fjarfundi,
16.07.2026 og hófst hann kl. 12:15
Fundinn sátu: Grétar Ingi Erlendsson formaður,
Sigurbjörg Jenný Jónsdóttir aðalmaður,
Gunnsteinn R. Ómarsson aðalmaður,
Elliði Vignisson bæjarstjóri,
Sandra Dís Hafþórsdóttir sviðsstjóri,
Fundargerð ritaði: Sandra Dís Hafþórsdóttir, sviðsstjóri
Í upphafi fundar leitaði formaður eftir athugasemdum við fundarboðið en engar bárust.


Dagskrá: 
Almenn mál
1. 2606039 - Innviðasamkomulag Akurholt
Lagt er fram innviðasamkomulag milli Sveitarfélagsins Ölfuss og Kots eignarhaldsfélags vegna uppbyggingar og framkvæmda innan deiliskipulagssvæðisins í Akurholti.

Samkomulagið kveður meðal annars á um áfangaskiptingu og framkvæmdahraða uppbyggingar, hönnun og gerð gatna, stíga, veitukerfa og annarra innviða. Landeigandi ber kostnað af uppbyggingu innviða og skal leggja fram þinglýsta tryggingu fyrir efndum vegna hvers framkvæmdaráfanga. Jafnframt er fjallað um eftirlit sveitarfélagsins, lokaúttektir, ábyrgðartíma og afhendingu gatna, opinna svæða og annarra almenningsrýma til sveitarfélagsins.

Gert er ráð fyrir að uppbyggingu þess svæðis sem samkomulagið tekur til verði lokið innan tíu ára frá undirritun þess.
Bæjarráð samþykkir fyrirliggjandi innviðasamkomulag við Kot eignarhaldsfélag vegna uppbyggingar í Akurholti. Bæjarstjóra er falið að ganga frá samkomulaginu og undirrita það fyrir hönd Sveitarfélagsins Ölfuss.

Samþykkt samhljóða.
2. 2607032 - Viljayfirlýsing vegna mögulegrar uppbyggingar gagnavers
Lögð er fram viljayfirlýsing milli Sveitarfélagsins Ölfuss og Glacier Grid ehf. um að kanna forsendur fyrir mögulegri uppbyggingu gagnavers á iðnaðarsvæði I5.

Verkefnið er hugsað sem áfangaskipt uppbygging með mögulegri heildarorkuþörf allt að 125 MW. Viljayfirlýsingin skapar ramma um áframhaldandi greiningu á lóðar-, skipulags-, orku- og innviðaforsendum verkefnisins. Hún gildir í tólf mánuði og felur ekki í sér skuldbindingu um úthlutun lands, afhendingu orku, uppbyggingu innviða, útgáfu leyfa eða fjárhagslega þátttöku sveitarfélagsins.

Viljayfirlýsingin, ásamt viðauka um stuðning við áframhaldandi viðræður, er lögð fram til samþykktar.
Bæjarráð fagnar áhuga Glacier Grid ehf. á mögulegri uppbyggingu gagnavers í Ölfusi og samþykkir fyrirliggjandi viljayfirlýsingu ásamt meðfylgjandi stuðningsyfirlýsingu.

Bæjarráð felur bæjarstjóra að ganga frá og undirrita gögnin fyrir hönd sveitarfélagsins. Samþykktin felur ekki í sér skuldbindingu um úthlutun lands, afhendingu raforku, fjármögnun innviða eða útgáfu leyfa, heldur heimild til áframhaldandi samtals, greiningar og undirbúnings verkefnisins.

Samþykkt samhljóða.
3. 2607034 - Viljayfirlýsing um samstarf við uppbyggingu á atvinnustarfsemi
Lögð er fram viljayfirlýsing milli Sveitarfélagsins Ölfuss og Landnýtingar ehf. um undirbúning mögulegrar uppbyggingar hátæknigróðurhúsa á iðnaðarsvæðinu á Sandi, norðan Suðurstrandarvegar.

Fyrsti áfangi verkefnisins gerir ráð fyrir um níu hektara landsvæði, þar af sex hekturum undir gróðurhús og einum hektara undir geymslu- og vinnslurými. Framtíðarsýn félagsins gerir ráð fyrir mögulegri stækkun í áföngum um allt að 31 hektara eða 40 hektara alls.

Viljayfirlýsingin gildir í tólf mánuði og er óskuldbindandi. Endanleg úthlutun lands, afhending veitna og uppbygging eru háð skipulagi, leyfum, afkastagetu innviða og gerð sérstakra samninga.
Bæjarráð fagnar áhuga Landnýtingar ehf. á uppbyggingu hátæknigróðurhúsa í Ölfusi og samþykkir fyrirliggjandi viljayfirlýsingu.

Bæjarstjóra er falið að undirrita viljayfirlýsinguna fyrir hönd sveitarfélagsins og vinna áfram að undirbúningi verkefnisins. Endanleg úthlutun lands og aðrar skuldbindingar sveitarfélagsins eru háðar lögbundinni málsmeðferð, samþykki þar til bærra stjórnvalda og gerð sérstakra samninga.

Samþykkt samhljóða.
4. 2607035 - Heimild til veðsetningar fasteigna við Laxabraut
Lagt er fram erindi First Water hf. þar sem óskað er eftir samþykki Sveitarfélagsins Ölfuss fyrir veðsetningu fasteigna félagsins að Laxabraut 15, 17, 19, 21 og 23. Samþykki sveitarfélagsins er áskilið samkvæmt ákvæðum gildandi lóðarleigusamninga.

Veðsetningin er vegna tryggingarbréfs að fjárhæð 200 milljónir evra, útgefnu til Landsbankans hf. og Arion banka hf. Gert er ráð fyrir að tryggingarbréfið njóti fyrsta veðréttar í viðkomandi fasteignum.

Lögmaður sveitarfélagsins hefur útbúið yfirlýsingu um heimild til veðsetningar.

Yfirlýsing um heimild til veðsetningar er lögð fram til samþykktar.

Bæjarráð samþykkir að veita First Water hf. heimild til veðsetningar fasteigna félagsins að Laxabraut 15, 17, 19, 21 og 23 til tryggingar á skuldum félagsins við Landsbankann hf. og Arion banka hf., í samræmi við fyrirliggjandi yfirlýsingu.

Fyrir liggur að First Water hf. er í skilum við sveitarfélagið. Bæjarstjóra er falið að undirrita yfirlýsinguna fyrir hönd Sveitarfélagsins Ölfuss.

Samþykkt samhljóða.
5. 2607031 - Kynningarbréf frá stjórn Samtaka sjávarútvegssveitarfélaga
Lagt er fram kynningarbréf frá Samtökum sjávarútvegssveitarfélaga. Sveitarfélagið Ölfus er eitt 26 aðildarsveitarfélaga samtakanna.

Samtökin eru sameiginlegur vettvangur sveitarfélaga til að gæta hagsmuna sjávarbyggða í málum sem tengjast meðal annars sjávarútvegi, lagareldi, höfnum, veiðigjöldum, atvinnuuppbyggingu og nýtingu sjávarauðlindarinnar.

Næsti aðalfundur samtakanna verður haldinn 7. október 2026. Þar verður meðal annars kosin ný stjórn og gert ráð fyrir umræðu um breytingar á samþykktum þannig að starfsemi samtakanna nái til lagareldis í heild en takmarkist ekki við sjókvíaeldi.
Kynningarbréf Samtaka sjávarútvegssveitarfélaga lagt fram til kynningar.
6. 2607033 - Erindi til sveitarfélaga vegna stefnumótunar í málefnum sveitarfélaga
Innviðaráðuneytið hefur ýtt úr vör vinnu við endurskoðun stefnumótandi áætlunar í málefnum sveitarfélaga þar sem fyrsta skrefið er gerð grænbókar um málefnið. Í grænbók birtist stöðumat á helstu lögbundnu verkefnum og öðrum viðfangsefnum sveitarfélaga og greining áskorana og tækifæra, sem lagt verður til grundvallar endurskoðun stefnu og aðgerðaáætlunar í málaflokknum.

Óskað er eftir því að sveitarfélögin veiti upplýsingar inn í þessa vinnu og svari meðfylgjandi spurningum fyrir 21. september nk.
Bæjarráð felur starfsmönnum að svara spurningum innviðaráðuneytisins vegna endurskoðunar stefnumótandi áætlunar í málefnum sveitarfélaga.

Samþykkt samhljóða.
Fundargerðir til staðfestingar
7. 2606006F - Framkvæmda- og hafnarnefnd - 86
Fundargerð 86.fundar framkvæmda- og hafnarnefndar frá 29.06.2026 til staðfestingar.

1. 2510047 - Fjárhagsáætlun hafnarinnar 2026. Til kynningar.
2. 2606047 - Ráðning vélstjóra á dráttarbát. Niðurstaða nefndarinnar staðfest.
3. 2606046 - Ekjubrú í Þorlákshöfn - viðgerð á tjökkum. Niðurstaða nefndarinnar staðfest.
4. 2603033 - Byggingarstjórn- og eftirlit með viðbyggingu grunnskóla. Niðurstaða nefndarinnar staðfest.
5. 2604020 - Framkvæmdir við opinn svæði 2026. Til kynningar.
6. 2601048 - Framkvæmdaráætlun 2025-26. Til kynningar.

Fundargerðin lögð fyrir í heild sinni og hún staðfest.
8. 2607002F - Framkvæmda- og hafnarnefnd - 87
Fundargerð 87.fundar framkvæmda- og hafnarnefndar frá 13.07.2026 til staðfestingar.

1. 2607026 - Dýpkun hafnarinnar. Niðurstaða nefndarinnar staðfest.

Fundargerðin lögð fyrir í heild sinni og hún staðfest.
Fleira ekki gert. Fundi slitið kl. 12:55 

Til bakaPrenta
Prenta síðu
X Loka
Var efnið á síðunni hjálplegt?