Fundargerðir

Fjölskyldu- og fræðslunefnd - 44

Haldinn í Ráðhúsi Ölfuss,
21.10.2026 og hófst hann kl. 08:15

Fundinn sátu: Bettý Grímsdóttir formaður,
Berglind Eva Markúsdóttir aðalmaður,
Oskar Rybinski aðalmaður,
Hrafnhildur Lilja Harðardóttir aðalmaður,
Helena Helgadóttir leikskólastjóri,
Hrafnhildur Hlín Hjartardóttir leikskólastjóri,
Guðlaug Einarsdóttir skólastjóri,
Inga Jóna Bragadóttir áheyrnarfulltrúi,
Hallfríður Snorradóttir áheyrnarfulltrúi,
Valur Rafn Halldórsson áheyrnarfulltrúi,
Harpa Vignisdóttir áheyrnarfulltrúi,
Eyrún Hafþórsdóttir sviðsstjóri,
Jóhanna M Hjartardóttir sviðsstjóri,

Fundargerð ritaði: Jóhanna M. Hjartardóttir, sviðsstjóri

Formaður setti fund og óskaði eftir athugasemdum við fundarboð en engar bárust.

Varaformaður boðaði forföll að morgni dags og náðist ekki að fá inn varamann.

Dagskrá:

Almenn mál

1. 2311017 - Skýrsla skólastjóra

Skólastjóri fór yfir starfsemi grunnskólans frá síðasta fundi. Í skýrslunni kemur fram að skólaárið hafi farið vel af stað og einkennst af öflugu skólastarfi, fjölbreyttum verkefnum og faglegri þróunarvinnu.

Kynntar voru breytingar á framsetningu námsmats í 10. bekk, upplýsingagjöf til foreldra um notkun skólatækja og skjánotkun, verkefni tengd nemendalýðræði, lestri, heilsueflingu og forvörnum, auk starfsþróunar starfsfólks.

Sérstaklega var greint frá góðum árangri skólans í Svakalegu lestrarkeppninni, þar sem skólinn hafnaði í 20. sæti af 108 þátttökuskólum og var eini skólinn á Suðurlandi sem komst á topp 30 listann. Einnig var sagt frá undirbúningi verkefnisins Lestrarvinir í samstarfi við eldri borgara.

Fjölskyldu- og fræðslunefnd þakkar skólastjóra fyrir greinargóða skýrslu um starfsemi skólans. Nefndin fagnar því öfluga og metnaðarfulla starfi sem fram kemur í skýrslunni, ekki síst árangri í lestrarverkefnum, virkri þátttöku nemenda í félags- og lýðræðisstarfi og áherslu skólans á velferð, forvarnir og faglega þróun.

2. 2610113 - Grunnskólinn í Þorlákshöfn - starfsáætlun 2026-2027

Starfsáætlun fyrir skólaárið 2026-2027 lögð fram til staðfestingar.

Í starfsáætluninni er gerð grein fyrir skipulagi skólastarfs, skóladagatali, helstu verkefnum og viðburðum skólaársins, skipulagi kennslu, stoðþjónustu, frístundastarfi, samstarfi við foreldra og nærsamfélagið auk markmiða um fagþróun og umbótastarf.

Sérstök áhersla er lögð á læsi, vellíðan og þátttöku nemenda, innleiðingu breytinga á aðalnámskrá og áframhaldandi þróun námsmats. Þá er meðal nýjunga á skólaárinu verkefnið Lestrarvinir sem ætlað er að efla lestrarfærni nemenda og tengsl kynslóða í samfélaginu.

Fjölskyldu- og fræðslunefnd þakkar fyrir vandaða og metnaðarfulla starfsáætlun Grunnskólans í Þorlákshöfn fyrir skólaárið 2026-2027.

Nefndin fagnar þeim áherslum sem þar koma fram um öflugt skólastarf, velferð nemenda, læsi, fagþróun starfsfólks og virkt samstarf við foreldra og nærsamfélagið.

Fjölskyldu- og fræðslunefnd staðfestir starfsáætlunina fyrir skólaárið 2026-2027.

3. 2608023 - Frístund - foreldrahandbók

Foreldrahandbók frístundaheimilisins lögð fram til staðfestingar.

Handbókin hefur að geyma upplýsingar um starfsemi frístundarheimilisins, markmið og áherslur starfsins, opnunartíma, skráningu og vistun barna, samskipti við foreldra, reglur um mætingar og brottför, öryggisatriði, hressingu, sumarfjör og gjaldskrár.

Markmið handbókarinnar er að stuðla að skýru verklagi, samræmdri upplýsingagjöf og góðu samstarfi milli heimila og frístundar. Í handbókinni er jafnframt lögð áhersla á öryggi, vellíðan og virka þátttöku barna í fjölbreyttu og uppbyggilegu frístundastarfi.

Fjölskyldu- og fræðslunefnd fagnar framlagðri foreldrahandbók frístundaheimilisins Brosbæjar.

Handbókin veitir skýrar upplýsingar um starfsemi, þjónustu og verklag frístundar og styrkir upplýsingagjöf og samstarf við foreldra og forsjáraðila.

Fjölskyldu- og fræðslunefnd staðfestir foreldrahandbók Frístundar fyrir starfsárið 2026-2027.

4. 2311012 - Skýrsla leikskólastjóra Bergheima

Lögð var fram skýrsla leikskólastjóra Bergheima um starfsemi leikskólans frá síðasta fundi.

Í skýrslunni er meðal annars fjallað um úrvinnslu og skil gagna til Héraðsskjalasafns Árnesinga, fagþróun starfsfólks á haustráðstefnu Hjallastefnunnar, samstarf við grunnskóla vegna undirbúnings barna fyrir grunnskólagöngu og markvissa skimun og sérkennsluþjónustu.

Einnig var greint frá þátttöku leikskólans í rannsóknarverkefni á vegum Háskóla Íslands, samstarfi við sjúkraþjálfara og væntanlegri heimsókn þýskra nemenda sem koma til að kynna sér starfsemi skólans og hugmyndafræði Hjallastefnunnar.

Fjölskyldu- og fræðslunefnd þakkar leikskólastjóra fyrir greinargóða skýrslu og fagnar öflugu fagstarfi, góðu samstarfi milli skólastiga og þátttöku leikskólans í þróunar- og rannsóknarverkefnum.

5. 2508002 - Skýrsla leikskólastjóra Hraunheima

Lögð fram skýrsla leikskólastjóra Hraunheima um starfsemi leikskólans frá síðasta fundi.

Í skýrslunni kemur fram að fjölbreytt og metnaðarfullt starf hafi verið unnið á haustmánuðum með áherslu á umhverfismennt, útikennslu, félagsfærni og fagþróun starfsfólks. Meðal annars er greint frá starfsdegi þar sem starfsfólk heimsótti leikskólann Akrasel og Waldorfskólann, auk þess sem hafin hefur verið ormarækt sem styður við sjálfbærni og umhverfisfræðslu barna.

Þá er sagt frá áframhaldandi innleiðingu Námfúss, ART-félagsfærniþjálfun skólahópsins, leiklistarkennslu og innleiðingu vináttuverkefnisins Blær. Einnig kemur fram að brunaæfing hafi gengið vel, unnið sé að útvistun ræstingaþjónustu og að starfsfólk hafi sameinast um gerð starfsmannasáttmála sem styður við jákvæða vinnustaðamenningu.

Fjölskyldu- og fræðslunefnd þakkar leikskólastjóra fyrir greinargóða skýrslu um starfsemi Hraunheima.

Nefndin fagnar öflugu og fjölbreyttu starfi leikskólans, sérstaklega áherslum á umhverfisfræðslu, útikennslu, félags- og tilfinningaþroska barna, auk markvissrar fagþróunar starfsfólks.

Mál til kynningar

6. 2610107 - Leikskólamál - gjöf til barna fædd 2023

Miðstöð menntunar og skólaþjónustu færir öllum börnum fæddum árið 2023 bókina Orð eru ævintýri að gjöf. Jafnframt fá allir leikskólar gjafir sem styðja við málþroska, læsi, vellíðan og hreyfingu barna.

Bókin Orð eru ævintýri kom út árið 2023 og hefur verið gefin öllum börnum á Íslandi fæddum árin 2018 til 2022. Nú er komið að börnum fæddum árið 2023.

Fjölskyldu- og fræðslunefnd fagnar framtaki Miðstöðvar menntunar og skólaþjónustu sem styður við málþroska og læsi ungra barna.

Nefndin þakkar kærlega fyrir bókagjöfina til barnanna og leikskóla sveitarfélagsins.

Skólastjórnendur og áheyrnafulltrúar viku af fundi.

7. 2603045 - Velferðarþjónusta - fundargerðir farsældarráðs

Vinnufundur Farsældarráðs Suðurlands var haldinn á Hellu 25.sept síðastliðinn. Fundargerð lögð fram til kynningar.

Nefndin þakkar kynninguna.

8. 2603046 - Velferðarþjónusta - fundargerð stjórnar Bergrisans

Fundargerð 96. stjórnarfundar Bergrisans lögð fram til kynningar.

Nefndin þakkar kynninguna.

9. 2610106 - Eldra fólk - fundargerð fagteymis húsnæðismála

Á fundi fagteymis húsnæðismála í Ölfusi þann 15. október 2026 voru umsóknir um íbúð að Egilsbraut 9 í Þorlákshöfn teknar til umfjöllunar og mats samkvæmt reglum Sveitarfélagsins Ölfuss um félagslegt leiguhúsnæði.

Sjá https://www.olfus.is/static/files/Stjornsysla/Reglur/2026/reglur-um-felagslegt-leiguhusnaedi-2026.pdf

Fundargerðin var send til nefndarmanna með Signet Transfer sem trúnaðargagn.

Fjölskyldu- og fræðslunefnd staðfestir niðurstöðu fagteymis húsnæðismála um úthlutun félagslegs leiguhúsnæðis að Egilsbraut 9, í samræmi við framlagða fundargerð.

Fleira ekki gert. Fundi slitið kl. 10:15

Til baka

Prenta

Prenta síðu

X Loka