Fundargerðir

Bæjarstjórn Ölfuss - 354

Haldinn í Ráðhúsi Ölfuss,
26.02.2026 og hófst hann kl. 16:30

Fundinn sátu: Gestur Þór Kristjánsson forseti bæjarstjórnar,
Sigurbjörg Jenný Jónsdóttir 1. varaforseti,
Grétar Ingi Erlendsson bæjarfulltrúi,
Erla Sif Markúsdóttir bæjarfulltrúi,
Vilhjálmur Baldur Guðmundsson bæjarfulltrúi,
Hrafnhildur Hlín Hjartardóttir 2. varamaður,
Berglind Friðriksdóttir bæjarfulltrúi,
Elliði Vignisson bæjarstjóri,
Sandra Dís Hafþórsdóttir sviðsstjóri,

Fundargerð ritaði: Sandra Dís Hafþórsdóttir, sviðsstjóri

Í upphafi fundar leitaði forseti eftir athugasemdum við fundarboð en engar bárust.

Dagskrá:

Almenn mál

1. 2602419 - Breytingar á gjaldskrá leikskóla

Í framhaldi af afar jákvæðri útkomuspá fyrir árið 2025 sem bendir til þess að hjá A hluta sveitarfélagsins verði hagnaður upp á 906 milljónir og rekstrarniðurstaða samstæðu verði 1.306 milljónir, samþykkti bæjarráð einróma að bæta hag barna og barnafjölskyldna enn frekar með því að taka upp gjaldfrjálsan leikskóla í allt að 36 stundir á viku frá og með 1. mars. nk.

Bæjarráð fól starfsmönnum að útfæra reglur þar að lútandi.

Fyrir bæjarstjórn lágu gögn ásamt þeirri tillögu að breytingu á gjaldskrá að allt að 36 dvalarstundir á tímanum 08:00 til 16:00 verði gjaldfrjálsar, að öðruleyti verði gjaldskráin óbreytt.

Tillagan felur eftirfarandi í sér:

*Gjaldfrjáls vistun verður í boði fyrir börn sem dvelja allt að 36 klst. á viku á tímabilinu kl. 08:00-16:00.
*Fæðisgjöld verða greidd sérstaklega og nema 12.815 kr. á mánuði fyrir fullt fæði (hádegismatur og tvær hressingar).
*Dvalarstund umfram 36 klst. innan tímarammans kl. 08 til 16 kostar samtals 4.400 kr. á mánuði fyrir hverja klukkustund á dag.
*Tími utan kjarnatíma, þ.e. fyrir kl. 08:00 og eftir kl. 16:00, verður reiknaður í 15 mínútna lotum og kostar 2.070 kr. á mánuði fyrir hverjar 15 mínútur.

Fyrir liggur að sparnaðurinn fyrir foreldra sem nýta 36 til 40 tíma á viku er 30.870. Foreldrar sem nýta sér 40 tíma greiða þá 4.400 á mánuði í stað 35.200 kr fyrir gjaldskrábreytingu og spara þar með 338.800 á ári. Foreldrar sem eru með tvö börn á leikskóla í fullri vistun spara þar með 575.960 krónur á ári, þegar tekið er tillit til þess að seinna barnið fær 30% afslátt.

Elliði Vignisson og Berglind Friðriksdóttir tóku til máls.

Berglind Friðriksdóttir bæjarfulltrúi H-lista lagði fram eftirfarandi bókun:

Fulltrúi H-lista fagnar jákvæðri útkomuspá fyrir árið 2025 og þeirri stefnu að styðja við barnafjölskyldur í sveitarfélaginu með gjaldfrjálsu leikskólaplássi að 36 stundum á viku. Markmiðið er gott og mikilvægt er að styðja við barnafjölskyldur.
Undirrituð gerir þó athugasemdir við málsmeðferðina. Afgreiðsla þess í bæjarráði 19. febrúar sl. fór fram án þess að fyrir lægi fagleg og efnisleg umfjöllun í fræðslunefnd eða formlegt samráð við stjórnendur og starfsfólk leikskóla, né umræða meðal kjörinna fulltrúa.
Um er að ræða veigamikla stefnumarkandi ákvörðun og verulega ráðstöfun opinberra fjármuna sveitarfélagsins. Eðlilegt og í anda vandaðrar stjórnsýslu hefði verið að slík ákvörðun færi í opið og skipulagt samráð, þar sem fagleg sjónarmið, rekstrarleg áhrif og forgangsröðun fjármuna til mikilvægra verkefna væru tekin til heildstæðrar skoðunar.
Fulltrúi H-lista leggur áherslu á að traust og fagleg stjórnsýsla byggist á gagnsæi, samráði og vandaðri málsmeðferð. Slíkt verklag er forsenda breiðrar sáttar og farsællar innleiðingar mikilvægra ákvarðana.

Erla Sif Markúsdóttir bæjarfulltrúi D-lista tók til máls og lagði fram eftirfarandi bókun fyrir hönd bæjarfulltrúa D-lista:

Það vekur furðu að gagnrýni sé sett fram á þeim forsendum að hér hafi verið um óeðlilega málsmeðferð að ræða. Umrædd ákvörðun snýr að breytingu á gjaldskrá leikskóla, sem samkvæmt lögum og verkaskiptingu sveitarfélagsins er skýrt og ótvírætt á forræði bæjarráðs. Það er því ekki rétt að halda því fram að málið hafi átt heima hjá öðrum ráðum eða nefndum, enda fellur gjaldskrárákvörðun undir stjórnsýslulegt hlutverk bæjarráðs.
Þá er jafnframt mikilvægt að halda því til haga að í aðdraganda ákvörðunarinnar höfðu farið fram umræður milli allra fulltrúa í bæjarráði um tilgreinda tillögu um gjaldfrjálsan leikskóla. Málið kom því ekki „fyrirvaralaust“ upp, heldur var það rætt og vegið í sameiginlegu samtali kjörinna fulltrúa áður en til formlegrar afgreiðslu kom.
Meirihluti D lista vill í þessu máli leggja mesta áherslu á hið jákvæða inntak ákvörðunarinnar. Með afnámi leikskólagjalda að 36 stundum er stigið stórt og mikilvægt skref til stuðnings fjölskyldum í sveitarfélaginu. Aðgerðin léttir verulega fjárhagsbyrði af foreldrum ungra barna, eykur jöfnuð og stuðlar að bættri stöðu barna óháð efnahag heimila. Fyrir margar fjölskyldur getur þessi breyting skipt sköpum í daglegum rekstri og aukið svigrúm til atvinnuþátttöku og fjölskyldulífs.
Fyrir liggur að sparnaðurinn fyrir foreldra sem nýta 36 til 40 tíma á viku er 30.870. Foreldrar sem nýta sér 40 tíma greiða þá 4.400 á mánuði í stað 35.200 kr fyrir gjaldskrábreytingu og spara þar með 338.800 á ári. Foreldrar sem eru með tvö börn á leikskóla í fullri vistun spara þar með 575.960 krónur á ári, þegar tekið er tillit til þess að seinna barnið fær 30% afslátt.
Það er því mikilvægt að umræðan taki mið af staðreyndum um málsmeðferð og hlutverk bæjarráðs, en ekki síður að horft sé til þess ávinnings sem ákvörðunin hefur í för með sér fyrir foreldra og börn í sveitarfélaginu.

Bæjarstjórn samþykkir tillögu að breyttri gjaldskrá og þar með gjaldfrjálsan leikskóla í allt að 36 tíma á mánuði án aukakostnaðar umfram það sem verið hefur vegna tíma sem eru umfram það.

Samþykkt samhljóða.

2. 2601083 - Fjölgun kjördeilda í Sveitarfélaginu Ölfusi

Lagt er til að fjölga kjördeildum í sveitarfélaginu um eina. Þannig verði starfandi ein yfirkjörstjórn og ein undirkjörstjórn.

Samþykkt samhljóða.

3. 1806017 - Kosning í nefndir og ráð Sveitarfélagsins Ölfuss 2022-2026

Kosning 3 aðalmanna og 3 varamanna í yfirkjörstjórn.
Kosning 3 aðalmanna og 3 varamanna í undirkjörstjórn.

Lagt er til að fresta málinu til næsta fundar.

Samþykkt samhljóða.

4. 2602417 - Samþykkt um hundahald

Endurskoðun á samþykkt um hundahald í Sveitarfélaginu Ölfusi. Lagt er til við bæjarstjórn að vísa samþykktinni til síðari umræðu.

Elliði Vignisson, Hrafnhildur Hlín Hjartardóttir, Erla Sif Markúsdóttir og Grétar Ingi Erlendsson tóku til máls.

Samþykkt samhljóða að vísa samþykkt um hundahald til síðari umræðu.

5. 2602418 - Samþykkt um kattahald

Endurskoðun á samþykkt um kattahald í Sveitarfélaginu Ölfusi. Lagt er til við bæjarstjórn að vísa samþykktinni til síðari umræðu.

Samþykkt samhljóða að vísa samþykkt um kattahald til síðari umræðu.

6. 2510080 - Hafnarsandur 2 - stækkun tengivirkis - Óv. ASKbr

Aðalskipulagsbreytingin var auglýst en engar athugasemdir voru gerðar við hana af umsagnaraðilum. Hún er því lögð fram í óbreyttri mynd til endalegrar samþykktar.

Afgreiðsla skipulags- og umhverfisnefndar: Aðalskipulagsbreytingin er samþykkt. Nefndin beinir því til bæjarstjórnar að skipulagsfulltrúa verði falið að ganga frá málinu í samræmi við 2. málsgr. 36. gr. skipulagslaga nr. 123/2010.