Reiðskóli og tamningaaðstaða í byggingu í Þorlákshöfn

Það hefur ekki verið mikið um byggingaframkvæmdir í Þorlákshöfn hin síðustu ár og því gleðiefni að sjá steypubíl keyra í gegnum bæinn einn góðviðrisdag í janúar.  Þegar undirrituð fór á vettvang til að forvitnast um hvað ætti að steypa varð gleðin enn meiri.  Arnar Jónsson og Sjöfn Sæmundsdóttir, ungt par í Þorlákshöfn eru að fara að byggja um 300 fermetra hesthús sem mun innihalda tuttugu einshestastíur, en það eru stíur fyrir einungis einn hest hver.  Í öðrum endanum á húsinu verður inniaðstaða með speglum þar sem hægt verður að bjóða upp á ásetuæfingar og reiðnámskeið fyrir börn.

Sjöfn lauk á síðasta ári þriggja ára háskólanámi á Hólum og er nú komin með reiðkennararéttindi auk þess að vera alvön tamningamanneskja.  Hún ásamt Arnari, ætlar að bjóða upp á reiðnámskeið fyrir alla aldurshópa.  Einnig verður boðið upp á eins til tveggja vikna námskeið fyrir erlenda ferðamenn sem geta þá gist í Þorlákshöfn.  Þetta verkefni verður unnið í samstarfi við Jón Arason, föður Arnars, en hann rekur Gistiheimili Jonna.  Boðið verður upp á spennandi ferðir um landið ásamt reiðnámskeiði.

Sjöfn leggur metnað í að temja sjálf hestana sem þjálfaðir verða fyrir reiðskólann, þannig getur hún boðið upp á sérþjálfuð hross í kennsluna.

Það verður spennandi að fylgjast með þessri uppbyggingu en mikil eftirspurn er eftir reiðskóla á Suðurlandi.

Meðfylgjandi myndir voru teknar þegar undirstöður undir grunninn voru steyptar. Ennfremur er þarna að finna mynd af hestakonunni Sjöfn Sæmundsdóttur.

BHG